Su Casteddu a pustis de sa vitòria contra su Como, sàbadu coladu, in sa giorronada benente at a chircare àteros 3 puntos foras de domo, contra su Cittadella, in s’istàdiu Piercesare Tombolato.
Seguru at a èssere una partida istragosa pro is òmines de Ranieri, pro ite is vènetos ant bìnchidu s’ùrtima gara contra su Pisa, una de is iscuadras prus balentes de su campionadu, cun su resurtadu de 1 a 2 a s’Arena Garibaldi.
Pro is òmines de Ranieri at èssere importante sighire s’àndala cumentzada in custu 2023, pro regalare un’àtera bella satisfatzione a is tifosos sardos, comente is sa gara a s’Unipol Domus contra is lombardos.
Is sardos ant a a afrontare is vònetos sena s’atacante Pavoletti, chi at marcadu sa prima rete in sa vitòria contra su Como, e is àteros infortunados: Mancosu, Obert e Deiola.
Galu non s’ischit chi is casteddajos ant a falare in campu cun s’ischema bator-bator-duos o imbetzes ant a giocare cun su tres-chimbe-duos, comente s’ùrtima partida colada. Amus a bìdere, ma seguramente a in antis in atacu sa còpia at a èssere Lapadula e Luvumbu. Pro su restu sa formatzione non diat dèpere cambiare meda in cumparàntzia dae s’ùltima isfida.
In custas dies, Ranieri at chircadu dae fàghere cumprèndere a s’iscuadra s’importu dae sa gara benente, e is giogadores sunt mutidos a donare una proa manna contra su Cittadella, dimustrende torra unu bellu giogu de iscuadra.
In medas sunt cumbìnchidos chi ant a lòmpere àteros giogadores pro afortiare su Casteddu. In tzitade s’est bidu su tzentrucampista Nainggolan, ma no est seguru chi su belga at a torrare a giogare un’àtera borta cun is sardos. Fortzis at a lòmpere su defensore Chiriches chi pro immoe est tesseradu cun sa Cremonese, in càmbiu dae Goldaniga.
Pro immoe su tzentrucampista Pereiro at saludadu sa Sardigna e su Casteddu e est móvidu in Uruguay pro giogare cun su Nacional Montevideo, custa istajone.
“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”
© RIPRODUZIONE RISERVATA
