Tecnologia, est essida un’aplicatzione: Artifact un’ìbridu intre rete sotziale e cuntenidore de noas
A ddu presentare is fundadores de Instagram.
Su mundu de sa tecnologia non “dormit” mai. S’aplicatzione Artifact, ingendrada dae is fundadores de Instagram, est istada presentada dae Kevin Systrom e Mark Krieger.
Is duos imprendidores informàticos chi ant lassadu Facebook in su 2018 a pustis de àere brigadu cun sa sotziedade americana, ant naradu chi custu programa informàticu est destinadu a annoare su sistema de comunicatzione digitale.
Si tratat de unu meschintzu intre una rete sotziale e unu cuntenidore de noas, basadu subra s’abbistesa artifitziale, chi sugerit is contenutos personalitzados a s’impitadore.
A su chi narat su giassu “The Verge”, est aberta a dispositivos iOs chi Android ma cun invitu ebbia.
Is duos creadores ant ispiegadu chi su nùmene Artifact est ispiradu a is tres faeddos subra is cales si basat su progetu: “artìculos, fatos e intelligèntzia artifitziale”.
Cando s’aviat s’aplicatzione sa prima borta, s’impitadore s’agatat dae in antis unu documentu de testu tzentrale acanta si bident is istòrias de editores de importantes testadas giornalìsticas americanas comente su New York Times e su Washington Post. Comente s’impitadore leghet àteros artìculos, s’aplicatzione comintzat a seletzionare is noas noas personalizendeddas.
Unu de is duos fundadores, Systrom, at ispiegadu comente su sistema de racumandatzione creadu dae s’iscuadra de sete persones de Artifact permitit de dare prioridade a su tempus chi si dèdicat a sa letura de determinados argumentos cunforma a is visualizatziones e a is cummentos.
Is imbentores de s’aplicatzione ant asseguradu chi at a èssere garantidu su pluralismu cuntenende semper noas de totu is partes polìticas e in prus ddoe at a èssere unu controllu mannu pro firmare deretu sa difusione de is noas farsas.
Systrom e Krieger, primos investidores de su programma, ant decraradu chi sa creatura noa issoro diat pòdere rapresentare un’àndala noas pro is aplicatziones de is retes sotziales, est a nàrrere prus miradas a is istòrias de interessu comunu respetu a sa publicatzione esclusiva de cuntenutos privados e personales.
Si esseret gasi diat èssere unu cambiamentu epocale a beru pro s’informatzione.
“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”
© RIPRODUZIONE RISERVATA
Sèrie B, su Casteddu at pèrdidu 2-0 contra su Modena
Is meres de domu ant meritadu de bìnchere, ma is sardos non sunt abarrados contentos de calchi detzisione chi at pigadu s’àrbitru in sa partida.
Nudda dae fàghere pro su Casteddu a foras de is muros amigos de s’Unipol Domus.
In s’ùrtima giorronada de Sèrie B, is ruju blu ant pèrdidu contra su Modena e sunt torrados in Sardigna a bèrtula bòida sena puntos pro sa classifica.
In s’Istàdiu Alberto Braglia est accabada 2-0 pro is meres de domu cun is gol marcados dae Diaw, gràtzias a unu rigore a mesu de su primu tempus, e un’iscutta lestra de pe’ de Bonfanti, a sa coa de sa gara. Is grugu-blu ant meritadu sa vitòria, pro ite sunt falados in campu cun gana e ant gherradu pro totu sa partida.
A s’imbesse, is òmines de Ranieri no ant tentu occasiones meda e ant fatu pagos o nudda tiros in porta. Su problema prus mannu chi ant àpidu is casteddajos est istadu cussu de non resèssire a fraigare giogu a tzentrucampu. A s’iscuadra diat a serbire unu regista, unu giogadore comente cussu chi su direttore isportivu at chircadu in su mercadu de fùbalu de su mese coladu, ma no est lòmpidu.
Tzertu calchi detzisione de s’àrbitru est discutibile, a comintzare de su rigore frùsciadu a favore de su Modena e pro acabbare, a su segundu cartellinu grogu assignadu a Rog.
Pro more de custu provedimentu su tzentrucampista ruju-blu est istadu bogadu e s’iscuadra sarda est abarrada in deghe omines a sa coa de su primu tempus.
Tocat a nàrrere chi a pustis, s’allenadori romanu at proadu a cambiare su giogu faghendu intrare àteros giogadores prus pasados, ma no est renèssidu prus a adderetare su resurtadu.
A is casteddajos ddis serbiant puntos a foras de domu pro abarrare in sa zona arta de sa classifica e est unu pecadu a beru, pro ite is ùrtimas garas coladas aiant indanimadu s’iscuadra e fiat motivada a fàghere bene.
Sa partida sighente de su Casteddu at a èssere contra su Benevento a sa s’Unipol Domus. Una partida difìtzile meda contra is campanos chi ant pèrdidu sa partida colada contra su Venezia 2-1, e custu resultadu est costada sa banchita a s’allenadore Fabio Cannavaro. Duncas is aversàrios, a pustis de custa cosa, ant a lòmpere in Sardigna cun prus gana galu.
“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”
© RIPRODUZIONE RISERVATA
