Su Gazetinu, chenàbura 3 de martzu de su 2023
S’autonomia de su Cunsòrtziu Unu de Aristanis est sarva. S’assessore regionale de s’Istrutzione pùblica Andrea Biancareddu at asseguradu chi in su disponimentu acapiadu a sa lege finantziària non ddoe at a èssere sa norma chi previdiat su tramudu de is ispesas didàticas postas pro is seas universitàrias de su territòriu in deretura a is Universidades de Casteddu e de Tàtari.
Eris su sìndigu Massimiliano Sanna est andadu a Casteddu pro s’auditzione dae parte de sa Cummissione permanente “Cultura e Istrutzione” de su Consìgiu regionale.
“Totu sa Cummissione regionale”, at naradu su primu tzitadinu de Aristanis, “est istada de acòrdiu cun is domandas nostras e totu is consigieris chi sunt intervènnidos ant sutaliniadu s’importu de tènnere un’universidade isparta in su territòriu, sutaliniende su bisòngiu de dd’afortigare”.
Chida passada su Consìgiu comunale de Aristanis aiat defensadu cun firmesa s’autonomia de su Cunsòrtziu Unu. S’Assemblea aristanesa dd’aiat fatu votende sena de banderas de parte unu documentu presentadu a is cabugrupos dae su consigieri de minoria Efisio Sanna. In cussa ocasione su sìndigu Sanna aiat naradu de àere domandadu un’addòbiu a sa Cummissione regionale.
Eris in Casteddu ant chistionadu fintzas de is prospetivas de crèschida de s’universidade in Aristanis. “Apo domandadu a manera formale a sa Regione de nos agiudare pro comporare su presone betzu de pratza de sa Majoria, oe pratza de Manno, sa règia giuigale antiga de is Arbaree, pro ddoe fàghere sa domo de s’istudiante. Un’investimentu”, at atzuntu su sìndigu Massimiliano Sanna, “chi diat èssere sa mègius manera pro cunfirmare sa voluntade de investire in sa crèschida de s’universidade in is territòrios”.
“Torramus a s’ispìritu de sa lege”, at decraradu su presidente de su Cunsòrtziu Unu Gianvalerio Sanna, “damus isperas a su territòriu nostru. Deo apo favorèssidu sa nàschida de s’universidade in Aristanis e non dia bòlere èssere testimòngiu de sa fine sua”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2022-2023 – L.R. 22/2018, art. 22.
