Su gatu agatadu suta sos muros rutos de una domo non si cheret istagiare dae su sarvadore suo
Enkaz cheret abarrare semper paris a su sarvadore suo. S’animale est istadu bogadu biu dae suta sas ruinas de una domo ruta a càusa de su terremotu in Turchia. Immoe non si cheret separare de chie nche l’at tiradu a foras dae cuddu inferru de carchina e de chimentu. Finas dae cuddas primas imàgines e fotografias chi sunt istadas ispartzinadas in sa retza, si biet custu gatu sùgiu, prenu de prùere e assustadu, istrintu tra sos bratzos de su sarvadore suo, istimendelu comente chi lu connoscheret de semper.
Fintzas Ali Cakas, custu est su nùmende de chie l’at sarvadu, s’est afetzionadu a issu. Ali est unu tziclista chi faghet parte de sa natzionale turca, chi comente a medas àteros est andadu a agiuare sos sucursos chi sunt acudidos a pustis de su disacatu mannu chi at corpidu sa natzione sua. Pròpiu iscavende tra sos cògios de sos palàtzios rutos, in un’istampu in mesu a su chimentu, at agatadu custu matzitu. Deretu a postu una fotografia in sos canales sotziales, narende chi si nde at a ocupare issu finas a cando no ant a èssere agatados sos meres. Su gatu est istadu agatadu in un’operatzione de sucursu a Nurdağı, unu distretu de sa provìntzia de Gaziantep. Ali l’at notadu in mesu a sos muros rutos de una domo. Su terremotu si fiat averguadu 129 oras a in antis, ma su matzitu, istracu e fertu nche dd’at fata.
S’iscuadra de chirca e sucursu de su tziclista at sarvadu medas àteros animales, ma Enkaz est seguramente su chi est abarradu de prus in su coro de totus pro more de s’istima e sa reconnoschèntzia chi at mustradu in deretura a su chi nche l’at bogadu dae cussu fossu. Custu raportu gasi ispetziale at fatu a manera chi su gatu immoe siat divènnida famada in sa retza, e in medas sigant su contu instagram de su sarvadores suo.
“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”
© RIPRODUZIONE RISERVATA
A s’iscoberta de su bidditzolu nuràghesu de Tiscali
Oe allegamus de una prenda archeològica cuada in sa chighirista de unu monte, in unu de sos ungrones prus ispantos de sa Sardigna. Semus alleghende de su bidditzolu ipogeu de Tìscali. S
Oe allegamus de una prenda archeològica cuada in sa chighirista de unu monte, in unu de sos ungrones prus ispantos de sa Sardigna. Semus alleghende de su bidditzolu ipogeu de Tìscali. Si tratat de un’aposentamentu nuràgicu chi s’agatat in intro de una gruta a làcana tra Durgali e Ulìana. Iscobertu a cumintzu de su sèculu XX, est a un’artia de chimbechentos metros e in intro si podet agatare su bidditzolu nuraghesu omònimu.
Pro more de sa positzione sua est friscu in s’istiu e caente in s’ierru. Fraigadu in diversas fases, s’insediamentu est formadu dae duas unidades, chi si podent datare a s’edade nuràgica (XV-sèculu VIII a.C.). Ma a pustis sunt istados torrados a acontzare in època romana e posca in s’Evu Mesanu Artu. A nord, agatamus baranta pinnetas tundas e ovales, cun muros istrintos, crobeca a tholos (o cun coma), cun intradas a architraves de tzinnèperu e nitzos in sa muradura. A sud-ovest, s’agatant unas trinta abitatziones prus piticas, cuadradas o retangulares.
Tìscali in custos annos est divènnida famada meda tra sos amantiosos de natura e archeologia. Est una de sas escursiones prus rechestas fintzas de chie non pràtica a fitianu escursionismu, pro more chi est inghiriada dae logos de una bellesa ambientale, naturalìstica, istòrica, archeològica e antropològica ispantosas. Su percursu prus praticadu est cussu chi movet dae sa badde de Lanaitu (Ulìana), atzufada in mesu su padente de èlighes e chercos.
S’escursione est una passigiada de unas cantas ora, cun unu dislivellu de batorghentos metros chi est fàtzile dae fàghere fintzas pro sos chi non sunt meda espertos. Ma cuntestu acanta custa escursione s’acumprit, agreste e a oe sena de signalètica, òbligat a sos noitzolos de s’afidare semper a una ghia locale. Difatis, essende custa una sas metas prus nòdidas de s’escursionismu sardu, càpitat medas bias chi medas escursionistas improvisados s’aventurent a sa sola e si perdant in mesu a custos montes iscòticos, ponende is trèulu sos sucursos chi a fitianu si devent mobilitare pro chircare escursionistas ispèrdidos.
