Su Gazetinu, mèrcuris 1 de freàrgiu de su 2023
S’istajone de is crotzeras in Sardigna s’illònghiat, ma in su calendàriu 2023 pro immoe si previdet un’arribu isceti a Aristanis.
Me in s’ìsula nostra, in totu, sunt in programma 191 isbarcos fintzas a s’acabbu de s’annu. Si cunfirmat sa presèntzia de cumpangias mannas comente a s’italiana Costa Crociere, sa tedesca Aida e s’isvìtzera Msc. Ma ant a arribare fintzas naves de crotzera de lussu, comente a cussas de sa frantzesa Ponant, de sa Silversea Cruises, chi tenet sa sea in su Printzipadu de Mònacu, e s’americana Seabourn Cruise Line.
Sa punna est sa de arribare a su mancus a 400.000 passigeris in su 2023. Ma ant a èssere pagos is chi ant a passare peri sa provìntzia de Aristanis. Ocannu passadu is naves isbarcadas in su portu de Santa Justa – Aristanis sunt istadas duas e nd’aiant batidu 99 passigeris apenas. In su 2021, imbetzes, s’istajone dd’aiat ruinada sa Covid-19, de tale manera chi no aiat arribadu nave peruna. Pro ocannu s’ispera fiat sa de pòdere contare nùmeros prus artos, ma pro immoe su calendàriu non si presentat in favore de custa ispera.
In su calendàriu si prevident sa bellesa de 117 isbarcos in Casteddu. Bene meda fintzas sa Gaddura, cun 66 arribos programmados a Terranoa e àteros duos a Fìgari. Tres arribos sunt seguros a Portu Turre e àteros duos a Arbatax.
Su grupu Virgin Voyages de is Istados Aunidos ocannu at renuntziadu: at a torrare a Casteddu e a Terranoa ocannu chi benit.
“Mancari non siat ancoras cussa definitiva”, narat su presidente de s’Autoridade de Sistema Portuale de su Mare de Sardigna, Massimo Deiana, “sa programmatzione de is crotzeras pro su 2023 punnat a crèschere, acostende-si a is nùmeros de is isbarcos de su 2019, ma cun unu nùmeru de passigeris chi, cunsideradu chi is naves sunt prus mannas, diat pòdere marcare record noos”.
“Tocat a traballare ancoras”, acabbat Deiana, “sa mòvida noa de is fieras in s’èsteru, e intra de custas su Seatrade Global de Miami in martzu, nos at a permìtere de tènnere cuntatos noos e de afortigare cussos chi tenimus giai, cun sa punna de fàghere crèschere is mercados in cuddos portos in ue – pro immoe – is cumpangias sunt presentes prus pagu”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2022-2023 – L.R. 22/2018, art. 22.
