Is carabineris de su Ros dd’ant agatadu in sa clìnica Maddalena de Palermo.
A pustis de 30 annos a sa mata est istadu arrestadu su capu Matteo Messina Denaro.
Sos carabineris de su Ros Su ant atzapadu su delincuente prus chircadu in Itàlia dae sa giustìtzia italiana, gràtzias a unu traballu longu coordinadu dae sa procura.
S’òmine de sa bidda de Castelvetrano, est istadu arrestadu eris a mangianu cando fiat isetende sa muda sua pro sa chemioterapia in s’istrutura ospedaliera Maddalena de Palermo.
A pustis, in sa caserma Dalla Chiesa, sede de sa Legione de is Carabineris, su procuradore de Palermo, Maurizio De Lucia, – chi at coordinadu s’inchiesta – e su generale de su Ros Pasquale Angelosanto ant fatu una cunferèntzia de imprenta pro ispiegare comente sunt lòmpidos a s’arrestu de su capu mafiosu. Foras de sa caserma at acudidu una surra de gente aplaudende is òmines de s’arma e aboghinende su nòmene de su giùighe Giovanni Falcone, ochidu in s’ochidòrgiu de Capaci.
A su chi s’ischit, Messina Denaro est istadu arrestadu gràtzias a un’istrategia sientìfica de isulamentu, seghende is raportos cun totus sos favoressidores e unu controllu a sa minuda de is intertzetatziones, finas a arribbare a sa clìnica acanta fiat in cura.
Su capu-màfia, a pustis de èssere istadu arrestadu, est istadu tramudadu a una localidade segreta e dae in cue at a èssere inserradu in unu càrtzere de màssima seguridade, comente fiat giai capitadu cun Riina e Provenzano.
Messina Denaro est istadu cundennadu a s’ergàstulu pro deghinas de mortes, comente cussa de su pitzocheddu Giuseppe Di Matteo, fìgiu de su pentidu, chi fiat istadu allupadu e isòrvidu in s’àtzidu a pustis de sa presonia, pro pro is istrages de su ’92 acanta fiant istados mortos is giùighes Falcone e Borsellino, e pro sos atentados de su ’93 a Milano, Firenze e Roma.
Significativa sa cointzidèntzia de s’arrestu de Messina Denaro cun cussu de Riina, acontèssidu pròpiu 30 annos a oe. Unu àteru corfu importante contra “Cosa Nostra”, mancari in custos deghènnios siat cambiada meda. Comente ant sutaliniadu is espertos tando si trataiat de un’organizatzione criminale sanguinària, ghiada dae su capu corleonesu, mentras su cabu trapanesu est istadu capatzu de dda mudare in un’assòtziu impresariale cun raportos istrintos cun s’econòmia e sa polìtica natzionale.
Immoe, cun s’atzapa de Messina Denaro, est Attilio Cubeddu su prus chircadu dae sa giustìtzia italiana.
“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”
© RIPRODUZIONE RISERVATA
Casteddu-Como: 2-0. Ranieri at bìnchidu sa prima partida
Importante vitòria pro is meres de domo. Pro is casteddajos is gol sunt istados marcados dae Pavoletti e Azzi.
Sàbadu a s’Unipol Domus is ruju-blu, contra su Como, ant torradu a bìnchere cun su resurtadu finale chi est istadu de 2-0.
Is òmines de Ranieri ant giogadu una partida bella a beru, s’atacante Pavoletti e su tzentru-campista de fàscia Azzi ant marcadu is gol.
Sa rete de s’italianu in su comintzu de sa partida, at postu sa gara in betada pro sardos e cussa de su brasiliano at cùngiadu sa gara, a pustis una bella calada fatu de sa fàscia manca.
A cussu chi s’ischiat is sardos diant àere faladu in campu cun s’ischema bator-bator-duos, imbetze ant giogadu cun su tres-chimbe-duos.
Tra is muros amigos, is casteddajos ant gherradu pro otènnere custos tres puntos de oro e immoe sunt comintzendu a artziare in is positziones prus artas de sa classifica de sa Sèrie B. Immoe a beru, s’allenadore romanu at a pòdere chircare de fàghere promòvere s’iscuadra a su màssimu campionadu nazionale.
Una vitòria de importu mannu est istadu custu disafiu, pro ite immoe su Casteddu nd’est bessidu dae sa crisi ténnica e resultados ufitzìalmente. Ranieri s’est cummóvidu meda prima de sa partida contra is lombardos, in cussu chi est istadu su segundu esòrdiu suo comente allenadore de is sardos. Is tifosos ruju-blu ant prenu totu s’istàdiu pro dimostrare s’istima a su ténnicu nou, pro ite no ant ismentigadu cussu chi est resèssidu a fàghere in is tres annos dae su 1988 a su 1991.
In sa partida chi benit is sardos,ant a giogare foras de domo, in s’istàdiu Piercesare Tombolato, contra sa Cittadella.
Seguru at a èssere una partida istragosa pro is òmines de Ranieri, pro ite is venetos ant bìnchidu s’ùrtima gara contra su Pisa, una de is iscuadras prus balentes de su campionadu.
Fortzis ant a lòmpere àteros giogadore in custas dies in Sardigna pro fàghere forte su Casteddu. In tzittade s’est bidu s’ex tzentrucampista Nainggolan e medas tifosos sunt cumbìnchidos chi est torradu pro giogare un’àtera bòrta cun is casteddajos.
Però,s’isperàntzia prus importante pro custa chida est de torrare a fàghere àteros tres puntos in Venetu cun su giogu bellu mustradu contra su Como.
“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”
© RIPRODUZIONE RISERVATA
