Una detzisione previdente pro una mègius seguridade de sos prus giòvanos in sas retes sotziales
Una noa importante in sos ùrtimos meses est arribada dae sa prataforma Tik Tok pro tutelare sos minores.
Difatis s’azienda at traballadu a modos noos pro limitare sa bisione de determinados tipos de contenutos pro sos prus giòvanos.
Si tratat de unu cambiamentu de importu mannu pro donare prus seguridade a sos impitadores prus giòvanos. S’aplicatzione, in unu messàgiu de su blog, at iscoviadu s’essida de una versione noa de su modellu suo de anàlisi, chi s’azienda impreat pro identificare in modu automàticu “cuntentos sessuales craros o a cuados.
Sa punna est de identificare sos vìdeos chi non vìolant in manera aberta sas lìnias ghia de sa rete sotziale ma chi podent resurtare no adatos a unu pùblicu de minores.
Su modellu de rilevamentu de sos contenutos de generatzione noa, segundu Tik Tok, in sos ùrtimos 30 dies diat àere giai impedidu a sos contos de sos pitzocos de visualizare prus de unu millione de vìdeos cun riferimentos sessuales.
In prus TikTok at annuntziadu de àere firmadu unu partenariadu cun StopNCII.org, un’aina in lìnia e de badas pensadu pro agiudare sas vìtimas de abusos de imàgines ìntimas cumpartzidas sena su cunsensu issoro.
De su matessi progetu faghet parte fintzas Meta, s’azienda mama de Facebook. S’iscuadra de s’Aplicatzione at afirmadu chi custa collaboratzione no at a frunire petzi unu suportu mègius a sas vìtimas, ma at a agiuare fintzas a impedire in manera automàtica chi sos contenutos identificados bèngiant publicados in sa piataforma.
S’obietivu est su de garantire chi sa comunidade, mescamente sos pitzocos, cando impreant TikTok tèngiant un’esperièntzia segura, positiva e gioiosa.
De seguru pro custa detzisione de s’azienda at contadu su fatu capitadu in su cumintzu de Nadale, cando s’Istadu de s’Indiana, in sos Istados Unidos, at tzitadu in giudìtziu s’isvilupadore de Tik Tok, sa sotziedade tzinesa Byte Dance, acusende•la de ammustrare a sos pitzocos cuntenutos pro adultos. Su procuradore generale, su republicanu Todd Rokita, at basadu sa tesi sua subraistùdios e raportos chi diant collegare s’impreu de sa piataforma a istorbos alimentares e depressivos tra sos prus giòvanos.
“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”
© RIPRODUZIONE RISERVATA
Andamus a connòschere unu logu ispantosu meda: sa tumba de is mannos de Osono a Triei
In mesu a is montes imbusciados dae bellos padenteddos s’at a pòdere ammirare custa òpera pesada de is òmines ogiastrinos antigos.
In custas dies coladas semus andados a Triei a bìdere unu de is logos archeólogicos mezus custoidos e de ispantu de s’Ogiastra: sa tumba de is mannos de Osono.
Est unu fràigu mannu a beru chi mesurat binti metros de lòngaria dae s’arcu de s’esedra e cun dòighi perdas mannas a inghìriu. In s’imbucada in s’aposentu de mortu ddu est su liminartzu de susu, longu prus deghe metros, cun sa cobertura fatta dae sette perdas ladas galu intreos.
Dae is repertos, chi sunt istados agatados in is forrojos archéologicos, si at a pòdere nàrrere chi custu logu est istadu travicadu dae su XVI séculu a.C. fintzas a su III séculu d.C. .
Ph: Roberto Anedda
Dae su sartu in ue est s’ispantosa tumba de is mannos trieddina, si pòdit bìdere totu su panorama chi mòvet de su Supramonte de Baunei e lòmpit fintzas a su mare de Arbatax. Tocat a nàrrere chi est istada una die bella a beru cun su celu craru chi nos at prenadu su coro de felitzidade.
Ph: Roberto Anedda
Pro lòmpere a custu logu depimus pigare s’istrada statale 125 chi dae sa bidda Lotzorai colat a su rughe de su caminu pro Ardali, furriare bia su campu de fùbalu de Triei e pustis una pariga de chilòmetros semus arribados.
Ph: Roberto Anedda
In mesu a is montes imbusciados dae bellos padenteddos s’at a pòdere ammirare custa òpera pesada de is òmines ogiastrinos antigos.
Ph: Roberto Anedda
In custu logu de Sardigna paret de intèndere chi sa terra siat sagrada cun is coròngios mannos traballados dae picapedreris sabius chi galu sunt istantàrgios.
Ph: Roberto Anedda
Sa tumba de is mannos de Osono, non tenet nudda dae imbidiare a is localidades archéologicas prus famadas de s’Ìsula. In prus de s’àteru ogni bìculu de custa cussòrgia tenet calicuna cosa chi mèritat de èssere bida. Pro cussos chi sunt inamorados de su mare, a curtzu ant agatare plajas cun colores bellos chi abarrant in su coro.
Ph: Roberto Anedda
Pro chi no ant mai bidu custos logos, amus detzisu de pònnere calicuna fotografia.
“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”
© RIPRODUZIONE RISERVATA
