Su Gazetinu, giòbia 2 de freàrgiu de su 2023
Isceti 325 intra de is 3.786 disponimentos antitzipados de tratamentu presentados in Sardigna pertocant abitantes de sa provìntzia de Aristanis. Semus faeddende de un’abitante ònnia 330, unu valore chi ponet sa provìntzia de Aristanis in su penùrtimu postu in Sardigna.
In su primu postu ddoe est sa provìntzia de Casteddu, cun unu disponimentu antitzipadu de tratamentu presentadu ònnia 262 abitantes, mentras in provìntzia de Tàtari sunt unu ònnia 304 e – aici etotu comente in Aristanis – unu ònnia 330 in su Sulcis. In provìntzia de Nùgoro addiritura est un’abitante ònnia 389.
Torrende a su datu provintziale de Aristanis, is valores assolutos s’abbassant si cunsideramus is disponimentos antitzipados de tratamentu carrigados in sa banca de is datos: apenas 298. S’analizu, però, dd’ant fatu movende dae is datos de 53 Comunes de su territòriu provintziale de 87, is ùnicos chi ant frunidu is valores.
S’istatìstica, a chimbe annos dae s’intrada in vigèntzia de sa normativa in contu de su testamentu biològicu, dd’at bogada a campu s’Assòtziu Luca Coscioni, gràtzias a una chirca fata dae Matteo Mainardi e Alessandro De Luca, a manos de pare cun is Tzèllulas Coscioni de totu Itàlia.
Sa punna sarda est aguale a sa mèdia de cussa a livellu natzionale: in totu is chi ant fatu su biotestamentu sunt isceti su 0,4 % de sa populatzione.
S’assòtziu, duncas, at incarreradu una campànnia de informu e nd’at faeddadu in sa pàgina associazionelucacoscioni.it. Est “una faina social chi movet dae unu vìdeu contadu dae Giobbe Covatta e intituladu “Su biotestamentu ispiegadu a is mannos”, una capia animada fata dae Simona Angioni e Giovanni di Modica cun sa ghia creadora de Avy Candeli, pro faeddare de s’importu de su testamentu biològicu e pro dare totu is informos pro ddu pòdere fàghere in presse”.
In su vìdeu, movende dae s’esperièntzia de sa morte de su gatu suo, una pipia ispiegat “a manera lèbia e dìliga a s’ajaju s’importu de pòdere espressare in antis is sèberos nostros pro su chi pertocat is tratamentos sanitàrios, pro transire s’arriscu chi custos sèberos ddos pighent àteras persones in pasa de nois”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2022-2023 – L.R. 22/2018, art. 22.
