Setzione ùnica pro is 28 cantantes e medas invitados.
Ispetu mannu pro sa de 73 editziones de su Fèstival de Sanremo, chi s’at a fàghere in su Teatru Ariston dae su 7 a su 11 de freàrgiu 2023.
Amadeus at a èssere torra su presentadore e diretore artìsticu pro bator annos de sighida.
Su presentadore at a èssere acostagiadu dae Gianni Morandi e dae àteros presentadores, comente a Chiara Ferragni. S’influentzadora, chi at a èssere presente in sa prima e in sa de chimbe seradas, at fatu a ischire de àere donadu sa paga sua a s’assòtziu D.i.Re., ativa in su luta contra sa violèntzia a sas fèminas. Imbetzes, in sa segundu serada a costadu de Amadeus ddoe at a èssere Francesca Fagnani
A su chi s’ischit is istràngios seguros presentes in custa editzione ant a èssere Al Bano e Massimo Ranieri. Is duos artistas de cabbale de s’istòria de sa mùsica italiana ant ant a pigare in su palcu paris cun un’àteru mannu , Gianni Morandi. No ant a mancare nemmancu is binchidores de s’annu coladu: Blanco e Mahmood.
Imbetzes, dae su palcu de sa nave Costa Smeralda – ancorada a dae in antis de su portu lìgure – ddoe at a èssere pro duas seradas unu de is rapadores prus importantes de su panorama natzionale: Salmo. Un’àteru artista presente in un’àtera die, istimadu meda dae su pùblicu prus giòvanu, at a èssere Gué.
A sa gara musicale ant a partetzipare 28 cantantes, de custos 6 chi arribbant dae Sanremo giòvanos 2022. Sa novidade at a èssere chi totus is artistas faghent a gara in un’ùnica setzione.
A su binchidore, comente fiat capitadu s’annu coladu a Blanco e a Mahmood cun sa cantzone “Brividi”, at a tocare s’onore de rapresentare s’Itàlia a s’Eurovision Song Contest. S’editzione de su 2023 est in programma dae su 9 a su 13 de maju in Inghilterra, a Liverpool.
In custa editzione no est galu segura sa partetzipatzione de sa cantante Madame, sende chi diat èssere suta inghesta pro sa chistione de is vatzinatziones farsas anticovid, e diat àere fintzas ammìtidu publicamente de non s’àere fatu su vatzinu.
De seguru custa editzione puru no at a delùdere. Amadeus at a èssere capatzu de rèndere interessante fintzas custu fèstival cun is essidas geniosas suas e de seguru cun calicuna botada de s’amigu Fiorello.
Custos is nùmenes de is cantantes in gara: Articolo 31 cun “Un bel viaggio”, Elodie cun “Due”, Giorgia cun “Parole dette male”, Colapesce e Dimartino cun “Splash”, Ariete cun “Mare di guai”, Modà cun “Lasciami”, Mara Sattei cun “Duemilaminuti”, Leo Gassman cun “Terzo cuore”, I Cugini di Campagna cun “Lettera 22”, Mr. Rain cun “Supereroi”, Marco Mengoni cun “Due Vite”, Anna Oxa cun “Sali (Canto dell’anima)”, Lazza cun “Cenere”, Tananai cun “Tango”, Paola e Chiara cun “Furore”, LDA con “Se poi domani”, Madame cun “Il Bene nel male”, Gianluca Grignani cun “Quando ti manca il fiato”, Rosa Chemical cun “Made in Italy”, Coma Cose con “L’addio”, Levante cun “Vivo”, Ultimo cun “Alba”, Gianmaria cun “Mostro”, Colla Zio cun “Non mi va”, Shari cun “Egoista”, Olly cun “Polvere”, Sethu cun “Cause perse” e Will cun “Stupido”.
“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”
© RIPRODUZIONE RISERVATA
Casteddu-Como: sàbadu is sardos ant a chircare un’importante vitòria a s’Unipol Domus
Pro Claudio Ranieri sa partida contra is lombardos at èssere su segundu esòrdiu suo comente allenadore in sa banchita ruju-blu.
Cussu de sàbadu contra su Como, pro su Casteddu at a èssere unu disafiu fundamentale.
Tra is muros amigos de s’Unipol Arena, is casteddajos ant a gherrare pro otènnere is tres puntos pro comintzare a artziare in is positziones prus artas de sa classìfica de sa Sèrie B, pro chircare de fàghere promòvere is sardos a su màssimu campionadu italianu.
Is òmines de Ranieri ant a mustrare sa gana de gherrare pro essire a lestru dae sa crisi de is resurtados, chi su mese coladu est costadu s’esòneru a Liverani.
Tzertu, su Casteddu at torradu a bìnchere contra su Cosenza, ùrtima in classìfica, cun Fabio Pisacane allenadore interinu in banchita, ma no est chi apant fatu unu giogu bellu meda.
Amus a bìdere comente is casteddajos ant a falare in campu in custu segundu esòrdiu de Ranieri, a pustis de is tres annos dae su 1988 a su 1991, cando fiat resèssidu a fàghere promòvere is casteddajos dae sa Sèrie C a sa Sèrie A, e s’ùrtimu annu in su màssimu campionadu natzionale a sarbare s’iscuadra dae sa torrada in sa sèrie minore.
A su chi s’ischit is casteddajos ant a falare in campu cun s’ischema bator-bator-duos: Radunovic tra is palos, lìnia de sa defensa cun Zappa, Capradossi, Altare e Barreca; a tzentru-campu ant a giogare Viola e Makoumbou a su tzentru, Kourfalidis e Nandez in is fàscias; a in antis in atacu sa còpia Lapadula e Pavoletti. At mancare galu su brasilianu Azzi, giogadore lòmpidu in custas dies dae su Modena, e is àteros infortunados: Mancosu, Di Pardo e Deiola.
Seguru at a èssere una partida istragosa pro is duas iscuadras, ma is meres de domo ant a tènnere s’istàdiu prenu de tifosos chi no ant ismentigadu a Ranieri. Semus seguros chi at a bastare a bìnchere custa disfida contra su Como pro nche bogare sa timoria chi s’est bida in custa istajone. S’isperàntzia pro su Casteddu est de torrare a fàghere innamorare is tifosos cun su giogu bellu, e est dàbile chi cun s’allenadore romanu custu potzat torrare a capitare.
“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”
© RIPRODUZIONE RISERVATA
